मन्त्रीका कुर्चीहरू अझै खालीछन्

सरकारी अड्डाका भित्ताहरू थर्किनेगरी

आधुनिक पहिरनमा एउटी तन्नेरी

गालीको पर्रा छुटाउदै

बर्बराउदै, धम्क्याउँदै भन्दैथिन्

अड्डामा काम छिटो किन भएन ?

आगोको रापले पोलेका

कालै बनेका भित्ताहरू,

भुईँ र छतहरू,

फिस्स हाँसे कन्टुकेको बुद्धि देखेर ।

तर सुने सबै गाली, घुर्कीहरू,

ध्वाँस र बेइज्जतीहरू ।

डर थियो ती जर्जर बनेका

भित्ता, भुईँ र छतहरूलाई

कतै बाँकी अँगहरू पनि

राप कै शिकार त बन्दैनन् ?

किन कि

ध्वाँसोले कालै भएको

अष्ट, व्यस्त र छरपस्ट सिँहदर्वारमा

मन्त्रीका कुर्चीहरू अझै खालीछन् ।