वाह ˜ के जमाना आएछ

पूर्णशोभा चित्रकार

****************

पहिले काम दिलाउनेले

काम गर्नेसँग अन्तर्वार्ता लिन्थे

अहिले भने काम पाउनेलेे

गर्छन् लामा प्रश्नहरू

वाह˜ के जमाना आएछ ।

तलब कतिछ?

सुविद्याहरू के के छन्?

विदाहरू के के मा छन्?

काम कति सजिलोछ?

प्रमोसन र भत्ताको व्यवस्था कस्तो छ?

वाईफाई, फोनको सुविद्या छ?

फेसबुक, युट्युब चलाउन पाइन्छ?

आम्मै के कुरा गरिस्या हजुरले?

सर्टिफिकेट त छ नि मसँग

कामको अनुभव पो छैन

काम नै नगरी त

कसरी अनुभवी होला?

नजानेको काम त

हजुरहरूले नै सिकाई बक्सेला?

मेरो भर्खर बिहे भएकोछ

कोठा खोज्दैछु

यहीँ कतै नजिकै पाउन सक्छु?

बाथरुम, पानीको सुविद्या कस्तोछ?

दुईचार जना पाहुनाहरू आउँछन्

घरपेटीले झ्याउ मान्लान्?

कचकच त नगर्लान् नि है?

महँगो छ बजार

दाल चामल तरकारी

र औषधीमुलो

सबै नै महँगो छ

महिनाको तलब त के तलब हजुर?

यसो भत्ता सत्ता र

खाना खाजाको व्यवस्था हुन्छ कि?

मेरा आफन्त साथीभाईहरू

अमेरिका, जापान, अस्ट्रेलिया

युरोप, मलेसिया र अरबमा पुगेकाछन्

मैले पनि पासपोर्ट बनाउँदैछु

अर्को दुई वर्षमा घडेरी किनुँला

फेरि अर्को दुई वर्षमा घर ठड्याउँला

दिनहरू सुखसँग काटौँला

आ˜˜ के कुरा गरिबक्सेको हजुरले?

हिउँ, बाकस र एयरपोर्टको कुरा?

आमा बाबुका पैत्रिक सम्पति,

घर जग्गाको कुरा?

विदेशबाट एयरपोर्ट ओर्लिँदा

ट्रलीमा खनखन्ती

पैसा पनि त आएकोछ नि हजुर ।

लौ भनिस्योस म हजुरको लागि

पर्फेक्ट छु कि छुईन?