प्रकृतिले मलाई सोधिन
एकाविहानै आज
प्रकृतिले सोधिन् ।
के तिमी मेरा प्यारा कलिला
मुनाहरुको निम्ति
केहि पल दिन सक्छौंं?
मुनाहरु, यो वातावरणको
फोहर र दुर्गन्धबाट
गर्मी र जाडोको सुखाबाट
बर्षातको भेलबाट
अशुरक्षित छन् ।
उनीहरु बाँच्नको लागि
जवानीमा हुर्किनको लागि
बंशजको शुरक्षाको लागि
म तिम्रो केहि पलको आशा गरिरहेकीछु ।
भन तिमी मेरा ती प्यारा कलिला
मुनाहरुको निम्ति
केहि पल दिन सक्छौंं?
बदलामा म तिमीलाई
पल पलमा खुशी नै खुशी दिन्छु ।
म तिमीलाई हरियाली दिन्छु
शितल पवन दिन्छु
मनै मुस्काउने
रंगी विरंगी फूलहरु दिन्छु
ऋतुपिच्छेका फलहरु दिन्छु
फूलमा बस्ने सुगन्ध दिन्छु
चिरविर गर्दै
मन मुग्ध गीत गाउने
थरिथरिका पंक्षीहरु दिन्छु ।
भन तिमी
मेरा केहि मुनाहरु हुर्काउन
तिमी केहि पल दिन सक्छौ ?
बदलामा म तिमीलाई
पल पलमा खुशी नै खुशी दिन्छु ।
५ मंशीर २०७७