आलोचना र प्रशंसा
म मान्दछु आलोचना खस्रो हुन्छ
रुखो हुन्छ
तर उ
निर्दयी हुँदैन सोचे जस्तो ।
***
कहिले मान्छेहरुको लागि उ
होशियारी पूर्वक पाईला चाल्न सिकाउने
पथ प्रदर्शक बनी दिन्छ
कहिले मान्छेहरुको लागि माथि उक्लने
भर्याँगको खुटकिलो बनी दिन्छ ।
***
प्रशंसा चिप्लो हुन्छ
त्यसको शव्द शव्दमा सुन्दरता झल्किन सक्छ
प्रशंसाले मान्छेलाई
क्षणिक आनन्द अनुभुती गराउन सक्छ ।
तर स्वार्थले लुट्पुटिएको चिप्लो प्रशंसाले
मान्छेलाई भूईंमा पछार्न पनि सक्छ
कहिल्यै उठ्नै नसक्ने गरी ।
दृष्टान्तहरु धेरै छन्
चिप्लो प्रशंसामा मान्छेहरु फँसेका
चिप्लेर लडेका र नीलडामै बोकेर हिँडेका ।
***
बुद्धिमानीहरु भन्छन्,
परिवर्तन चाहने मान्छेहरु
विपक्षको सामू शीर उठाई
निर्भिकतापूर्वक तर्क वितर्क गर्दछन् ।
उनीहरु
आलोचनालाई घृणा गर्दैनन्
आलोचनाबाट भागी हाल्न खोज्दैनन्
बस्दैनन् उनीहरु ढुकेर मौका
आलोचकहरुसंग बदला लिन ।
***
पटमूर्खहरु
चाटुकारहरुको प्रशंसाको पुजारी हुन्छन्
सपनामा पनि उनीहरु
झुण्ड झुण्ड चाटुकारहरु र प्रशंसकहरु
आफ्नै वरपर घुमेको देख्न खोज्छन् ।
***
अनुभवीहरु अनुभव सुनाउँछन्
स्वार्थले लटपटिएको चिप्लो प्रशंसा भन्दा
चोखो मनले गरिएको आलोचना
कैयौं गुणा हितकारी हुन्छ ।
मूर्ख मित्रको प्रशंसा भन्दा
ज्ञानी शत्रुको आलोचना
कैयौं गुणा गुणकारी हुन्छ ।