एउटा घाईते कुकूर
एउटा घाईते कुकूर
ढाड बाँगिएको, खुट्टा लोलाएको
टोलको गल्लीहरुमा लुखुर लुखुर हिड्दैछ उ ।
गह्रुँगो टाउको सकी नसकी उठाई
लाछि कुकूरहरुबाट बची बची
पुच्छर टाँग मुनी लुकाई
दुईटै कान लत्रक्क लट्काई
टोलको गल्लीहरुमा लुखुर लुखुर हिड्दैछ उ ।
ठूलो घराना मै पुगेको थियो उ
घुर्क्याई घुर्क्याई मासु भात टन्न खान्थ्यो उ
पाए मोटो हड्डी पनि च्र्याम चुरुम चपाउँथ्यो उ
तर आज टोलको गल्लीहरुमा लुखुर लुखुर हिड्दैछ उ ।
मनमत्ता थियो उ
फुर्कि फुर्कि हुर्केको थियो उ
टोलै थर्कने गरी भुक्थ्यो उ
घरका पाउनालाई पनि टोक्थ्यो उ
तर आज टोलको गल्लीहरुमा लुखुर लुखुर हिड्दैछ उ ।
उघुमै चम्केको थियो उ
कहिले टोलको कुखुरा चिथोर्थ्यो
कहिले टोलकै मान्छेमाथि झम्टन्थ्यो
सवैतिर उसकै राज थियो
सवैमा हाहाकार थियो
तर आज टोलको गल्लीहरुमा लुखुर लुखुर हिड्दैछ उ ।
खै कसलाई रीस उठ्यो
खै कसलाई उसको स्वभावले भाउन्न भयो
बेस्सरी ठोकेछ क्यारे कसैले
मालिकको शरणबाट पनि घोक्य्राईएछ क्यारे
ढाड बाँगिएको, खुट्टा लोलाएको
एउटा घाईते कुकूर
टोलको गल्लीहरुमा लुखुर लुखुर हिड्दैछ उ ।