सुनसानमा रमाउन खोज्दैछु म
कोरोना, लकडाउन, एकान्त
सडक, टोल, वस्ती, कोलाहलरहित सुनसान
यहि एकान्त र सुनसानमा रमाउन खोज्दैछु म ।
बगैंचामा चुपचाप ठिंग उभिएका
राता, सेता, पहेंला फूलहरुसितै
रमाउन खोज्दैछु म ।
ओईलिएका
आफ्ना अन्तिम दुःखका कथाहरु सुनाउँदै गरेका
सुकेका फूलहरुसितै
रमाउन खोज्दैछु म ।
जवानीमा धपक्क रंग फुरेका फूलहरु
नयाँ जीवनको लागि हाँक दिई उठेका
फक्रनै खोजेका कोपिलाहरुसंगै
रमाउन खोज्दैछु म ।
काँढैकाँढा विच फुलिरहेका गुलाबका फूलहरुसंगै
हुर्किन नपाउँदै निमोठिएका नाङ्गा हाँगाहरुसितै
रमाउन खोज्दैछु म ।
फक्रँदै गरेका मसिना हरिया पातहरुसंगै
फलदिन ठिक्क परी नुहेका हाँगाहरुसित
पहरामा चढ्दै गरेका लहराहरुसित पनि
रमाउन खोज्दैछु म ।
यो लकडाउन, सुनसान र अत्यासलाग्दो दिनहरुमा पनि
बसन्तको सरर चल्ने शितल पवनको मिठास संगसंगै
रमाउन खोज्दैछु म ।